மாரடைப்பால் இறந்ததாக கூறப்பட்ட நடிகை சோனாலி கொல்லப்பட்டாரா?.. சகோதரர் புகாரால் பரபரப்பு

பனாஜி: நடிகை சோனாலி போகட்டின் மரணம் இயற்கையானது இல்லை. உணவில் விஷம் வைத்து கொல்லப்பட்டார் என்று அவரது சகோதரர் பரபரப்பு குற்றம் சாட்டியுள்ளார். அரியானாவைச் சேர்ந்த நடிகை சோனாலி போகட்(42),  கோவாவுக்கு சுற்றுலா சென்றபோது திடீரென மாரடைப்பு ஏற்பட்டு நேற்றுமுன்தினம் மருத்துவமனையில் அனுமதிக்கப்பட்டார்.  அவரை பரிசோதித்த டாக்டர்கள் சோனாலி ஏற்கனவே உயிரிழந்து விட்டார் என அறிவித்தனர்.

இதற்கிடையே, சோனாலியின் மரணத்தில் சந்தேகம் உள்ளதாக அவரது சகோதரரும், சகோதரியும் புகார் கூறியுள்ளனர். சோனாலி மரணத்திற்கு முன்னால் நடந்த இரவு விருந்தில் பரிமாறப்பட்ட உணவில் விஷம் கலக்கப்பட்டுள்ளது என்று சகோதரர் கூறி உள்ளார். இதுபற்றி கோவா டி.ஜி.பி. ஜஸ்பால் சிங் கூறும்போது, “இதுவரை எங்களுக்கு சந்தேகத்திற்குரிய விஷயம் எதுவும் தென்படவில்லை. பிரேத பரிசோதனை முடிவுக்கு பின்னரே என்ன விவரம் என்பது தெரிய வரும்’’ என்றார்.